研究: 買樓會更加窮

明年樓市，有人講過，香港地買樓嘅需求彈性唔高，點都會有人分段入市「上車」，整體似乎都未太悲觀。

但大市下行時，應唔應該「上車」呢？原來外國麻省理工學院，有兩位經濟學博士做咗個研究，結論竟然係，買樓會令窮人更窮﹗雖然研究原始數據來自美國樓市，唔能夠直接應用於香港，但考慮「上車」前，不妨參考…

經濟衰退時，樓價偏跌，從二零零七年美國嘅資產數據可見，最富有嘅兩成屋主，槓桿比率只有百分之七，遠低於貧窮屋主嘅八成。其次，無用晒所有錢來買樓嘅有錢人，每擁有1美元的房屋淨值，就有4美元的其他資產，像是貨幣市場基金、股票及債券，反而窮人每擁有四美元的房屋淨值，先有一美元的其他資產。呢個時候，窮人供樓還債，其實形同透過金融體系流入有錢人手中，但窮人窮得只剩下樓，無其他投資工具對沖。

二零零六至零九年，美國樓價大跌咗三成，然後一直低到二零一二年。反而股市同債券好快回塘，窮人勉強上車，因為負債同資本單一，樓價隨整體經濟一跌，財富以窮人跌得比例最多。作者又以美國為例，零七年嘅時候，最有錢嗰一成人，只係佔有經濟體七成財富，但到咗一零年，慢慢升到七成四，到今日我哋會話，最有錢嗰百分之一嘅人，隨時擁有九成九財富，為咗買樓出盡全力，令富者愈富，貧者愈貧，似乎又幾啱喎。