男人愛高達，女人唔明白

無我

「男人愛高達，女人唔明白」，男人心聲有段故﹖荃灣一家舊式玩具店掛出的廣告牌近日獲網民盛讚，全因箇中金句道盡不少熱愛模型玩具的男士心聲，但原來這句街知巷聞的金句除承載有趣的由來外，亦背負了一個良心店主對玩具堅持的信念。

「以前隔離舖係賣銀器，有個男人等佢女朋友買首飾等咗好耐，咪入嚟我舖頭睇吓，仲買咗盒RX78(高達)，結果畀佢女朋友話。」現年30多歲，笑言是「溝唔到女嘅毒男」的阿列是荃灣一家玩具店的店主，他見東網記者到訪，娓娓道來金句的來歷，卻因害羞只肯半邊樣貌出鏡。

他憶述當年在商場開設玩具店時，目睹一名中年男士在等待女朋友期間購買了一盒高達後被怪責「又買高達﹖」該男士反駁「你點會明我呀﹖你都揀咗(首飾)成個鐘啦﹗」對話觸發他寫出第一句金句「男人愛高達，女人唔明白」貼於店外，竟引起不少模型愛好者的共鳴，後來更成功令慘淡的生意好轉。

至後來商場結業，阿列選擇留在荃灣繼續經營，惟開業初期，生意慘不忍睹，困局令阿列再次想起昔日的金句，因此在路口加裝印有「呀仔買高達 呀媽唔明白」的廣告招牌，成功吸引不少街坊熟客重臨玩具店。

阿列坦言荃灣區內不少小朋友均來自基層家庭，因父母忙於工作，對子女疏於照顧，「啲小朋友好似自生自滅咁」，玩具店便成了他們僅有的聚腳點，「古天樂都有自己嘅玩具倉，荃灣嘅小朋友都應該有屬於佢哋嘅玩具倉」，他更指最開心是見到一家大細來選購玩具的情景，過去亦有不少溫馨場面，「試過有個六年班嘅阿哥儲咗好耐零用錢，走嚟買玩具送畀妹妹。」

「幾百蚊佢哋點買﹖幾十蚊可以畀佢哋有得玩。」而店內亦特意出售一些價格較便宜的玩具，是阿列專為基層家庭兒童而設。阿列透露過往曾有不少小朋友於店內高買，但他即使發現亦從未有報警處理，「報警無咩用，我同佢(小朋友)講，你呢一刻攞玩具，第日你就會攞其他嘢﹗然後要佢罰企五分鐘先畀佢走，最緊要令佢明白咁樣做唔啱。」

言談間，阿列透露業內惡性競爭令經營玩具行業十分艱難，「有人問我點解唔出深水埗批發街做，好搵好多，但我覺得自己唔需要揸靚車，有飯盒食就夠，所以留番喺荃灣服務街坊。」諸多經營困難未有減少阿列為荃灣區模型愛好者及小朋友保留一片樂土的決心，他指玩具店倉底仍有不少積存的舊貨，期望可以仿傚深水埗明哥，幫助基層人士，日後把玩具送贈予區內基層家庭兒童。

monkeyboy

Hahahaahahahahaha

iamme

男女大不同MA

lmmh9922

Hahahaahahahahaha

Mk007

Hahahahahahahahahaha

hhjjkkll

Hahahahahahahaha

Fung628

Hahhahhahhaaha

Simon兄

haha...點同呢

Peterlam2018

Hahaha!!!!!