Ｎ號房事件

choicecare

最近除咗武漢肺炎佔據咗新聞頭條之外，韓國嘅Ｎ號房事件再次令全球聚焦係性暴力及性剝削等議題上。


由2018年開始，有人利用Telegram設立唔同需付費嘅聊天室，以發佈藉威脅、恐嚇、勒索等手段取得嘅性虐影片牟利，而加入聊天室觀看影片嘅成員亦需按照管理員要求，發表與性有關嘅話題，甚至係影片。


隨著聊天室收費越高，發佈內容亦越趨不雅甚至非人道，聊天室成員亦可對受害者作出不同威脅甚至強姦，當中有部分受害者為未成年者，最細只有11歲。現時，主謀之一嘅聊天室管理員已落網，但據韓國媒體報導，至少有25萬人次曾加入聊天室，而韓國警方亦表示不止會追查管理員，成員以及觀眾亦會調查。


不過，要起訴「單純觀眾」有一定難度，但即使法律無法制裁，「淨係得個睇字」無疑係呢埸性暴力嘅共犯。另外，網絡上仍存在一啲惡意攻擊受害者嘅留言，呢啲評論都係對受害者嘅二次傷害。性暴力並非只限於性行為，只要言語以及態度方面對對方身體有性方面嘅冒犯，如果對方唔情願同覺得唔舒服，就已經係可以定義為性暴力。


在此，小編希望大家作任何批評前要三思，唔好因為網絡嘅匿名性而令自己成為助長性暴力風氣嘅共犯。若然你遭受性暴力嘅傷害，請謹記你唔應受到來自任何人嘅責備，包括自己。如有需要，亦可聯絡我地傾訴，唔需要獨自承受。

------------------------
再思社區健康組織
性健康諮詢;
免費、不記名、保密、
愛滋病毒/梅毒快速測試